IDARA ya elimu katika Halmashauri ya Wilaya ya Bunda, mkoani Mara, imetumia zaidi ya sh bilioni 3.4 kwa ajili ya ujenzi wa nyumba za walimu na shughuli za maendeleo ya elimu kwa kipindi cha miaka mitano.

Ofisa Elimu wa Wilaya Bunda, Yesse Kanyuma, alisema fedha zilizopokelewa kutoka Serikali Kuu kwa ajili ya utekelezaji wa Mpango wa Maendeleo ya Elimu kwa Shule za Msingi (MMEM), kwa kipindi cha kati ya mwaka 2002 hadi Juni 2007.

Kanyuma, alisema katika kipindi hicho, fedha hizo zilijenga nyumba 80 za walimu zilizogharimu sh milioni 456.1; vyumba vya madarasa 426 vyenye thamani ya sh bilioni moja, ujenzi wa vyoo 592 vya wanafunzi kwa gharama ya sh milioni 60 na utengenezaji wa madawati 1,608 kwa sh milioni 100.

Alifafanua kuwa idara ya elimu katika halmashauri hiyo imenunua vitabu vya kiada na ziada vilivyogharimu sh milioni 487.7; ununuzi wa vivunge vya sayansi vyenye thamani ya sh milioni 56.1; tufe na vivunge vya hisabati vilivyogharimu sh milioni 62 huku halmashauri hiyo ikitumia zaidi ya sh bilioni 1.7 kwa ajili ya ruzuku ya uendeshaji wa shule za msingi.

Hata hivyo, amekiri kuwa wilaya hiyo inakabiliwa na matatizo katika shule za sekondari, hivyo zinahitajika sh bilioni 6 kwa ajili ya ujenzi wa nyumba 673 za walimu kwa shule 24 za wilayani humo huku shule hizo pia zikihitaji jumla ya sh milioni 768 kwa ajili ya ujenzi wa vyumba 192 vya madarasa.