WANANCHI wa kisiwa cha Pemba, hivi karibuni wanatarajiwa kuanza kutumia huduma ya umeme wa malipo kabla, unaofahamika kama TUKUZA, baada ya Shirika la Umeme Zanzibar kutangaza kufunga mita za huduma hiyo.

Akizungumza na waandishi ofisini kwake, Meneja wa huduma za wateja katika Shirika la Umeme la Zanzibar, Abdallah Haji, alisema shirika lao limeagiza mita 20,000 kutoka Afrika Kusini kwa lengo la kuzifunga kwa wateja wa Unguja na Pemba.

“Ni kweli tutafunga mita za TUKUZA kisiwani Pemba huko Wete, ili kuondosha tatizo la usumbufu unaowapata wateja wa shirika,” alisema.

Alisema hadi sasa wameshapokea mita 2,000 ambazo zitafungwa katika maeneo mbalimbali, ikiwemo Mji Mkongwe wa Zanzibar.

Mradi wa kufunga mita za TUKUZA, ulianza katika mwaka 1999 na kufadhiliwa na Benki ya Dunia ambapo tayari jumla ya mita 3,900 zimefungwa katika maeneo mbalimbali Unguja yakiwemo Migombani, Michenzani na sehemu za Kiembe Samaki na Uwanja wa Ndege.