MBUNGE wa Ilala, Mussa Azzan (Zungu), amesema wizi umekithiri katika Bandari ya Dar es Salaam.

Mbunge huyo alisema hayo juzi jioni bungeni alipokuwa akichangia mjadala wa hotuba ya bajeti ya serikali iliyowasilishwa na Waziri wa Fedha, Zakhia Meghji, wiki iliyopita.

Alisema wizi ni moja ya sababu zilizoifanya Uganda isipitishe tena mizigo yake katika bandari hiyo.

Sababu nyingine alisema ni ucheleweshaji mizigo ambao alisema umekithiri, ikilinganishwa na bandari nyingine.

Zungu alizungumzia pia suala la wawekezaji kwenye sekta ya madini, na kuhoji sababu zinazowafanya wageni hao washindwe kujenga majengo ya kisasa katika maeneo ya madini au katika miji kama Dar es Salaam .

Alisema miji kama Johannesburg imejengwa kwa dhahabu, lakini hapa nchini, utajiri wa madini unapelekwa nje.

Zungu ambaye aligusia mambo mengi kwa haraka haraka, alitoa rai maalumu kwa serikali kuhakikisha Barabara ya Uhuru inajengwa ili kuondoa msongamano na aibu, hasa kwa wageni wa kitaifa.