Na Muhibu Said

BAADHI ya wahadhiri wa Chuo Kikuu cha Dar es Salaam (UDSM), wameonya kuwa mashambulizi ya Marekani dhidi ya Somalia hivi karibuni, yatakuja pia Tanzania kwa kuwa nchi hiyo inaamini kwamba wafuasi wa mtandao wa kigaidi wa Al-Qaeda wapo pia hapa nchini.

Wameyasema hayo siku chache baada ya ndege za kivita za Marekani zilizoruka kutoka kwenye meli za kivita, kushambulia Somalia kwa makombora na kuua watu kadhaa na kujeruhi wengine katika kile kilichoelezwa kuwa ni kusaka wafuasi wa mtandao wa Al-Qaeda nchini humo.

Akizungumza katika mhadhara wa kujadili kilichotokea na kinachoendelea kutoka Somalia, katika ukumbi wa Starlight, jijini Dar es Salaam, Ijumaa ya wiki iliyopita, Profesa Hamza Njozi, alisema sheria ya ugaidi iliyotungwa na serikali kwa shinikizo la Marekani, ni uthibitisho wa dhana ya kuwapo magaidi Tanzania ambao ndio walengwa wakubwa wa mashambulizi ya nchi hiyo duniani.

Profesa Njozi, alisema uthibitisho mwingine ni kauli ya mtaalam mmoja wa masuala ya ugaidi duniani ambaye katika moja ya maandiko yake alikanusha kuwapo kwa wafuasi wa Al-Qaeda Tanzania, lakini akadai kwamba waliopo ni mashabiki wa mtandao huo.

Kutokana na hali hiyo, Profesa Njozi alisema kwa kuwa operesheni za Marekani za kuwasaka Al-Qaeda, zimekwisha kuingia katika Ukanda wa Afrika Mashariki na kutumia nchi kama vile Djibouti kama kituo chake cha kijeshi kwa ajili ya kuendesha operesheni hizo na kutahadharisha kwamba baada ya mashambulizi dhidi ya Somalia, wakati wowote yatakuja pia Tanzania.

Hivyo, alisema hakubaliani na agizo lililotolewa hivi karibuni na Mkurugenzi wa Upelelezi wa Makosa ya Jinai nchini (DCI), Robert Manumba, la kuwataka Watanzania kutojihusisha na operesheni za Marekani nchini Iraq kwa kuwa mambo hayo yanafanyikia mbali na Tanzania.

"Tusifikiri mashambulizi ya Somalia hayatuhusu Watanzania, wakimaliza Somalia watakuja pia Tanzania, Marekani imekwisha kusema na hapa Tanzania Ma-Al-Qaeda wapo pia na ndio maana imetungwa sheria ya ugaidi na yupo mtaalam wa masuala ya ugaidi aliyesema Tanzania hakuna Ma-Al-Qaeda, lakini kuna mashabiki wa Al-Qaeda," alisema Profesa Njozi.

Hata hivyo, aliwapongeza Watanzania kwa kutokutetereka licha ya Marekani kuzishambulia kwa nyakati tofauti nchi za Afghanistan, Iraq, Sudan na Somalia.

Akichangia mjadala huo, Profesa Haroub Othman, alisema njia pekee ya kuisaidia Somalia, si kupeleka majeshi ya kulinda amani, badala yake ni kuisadia kuunda serikali ya kitaifa inayoungwa mkono na wananchi wote na kuleta maelewano baina yao.